ايام من امتحاناتي

قصتي ومحاسبة الزكاه

بداية اطلب من جميع زوار المدونة الدعاء لي في الامتحانات المتبقية

ولقد اتيت اليوم لاحدثكم عن يوم من ايام الامتحانات فرصة وانا مريح من المذاكرة

كان عندي يوم الاحد 6/1 امتحان في مادة محاسبة الزكاة واللي مفيش في

مصر كلها جامعة بتتدرسها غير جامعة اسكندرية وبس

اصلها جامعة متدينة المهم قبليها بيومين كانت الاعصاب مشدودة والمذاكرة قرفاني جداً

لان المادة سهله وحلوة ومفيدة جداً وميتخفش غير من المواد السهلة دي

ومشكلتها في بنود كتير لازم تتحفظ ومقلقعة قوي وبالاخص الجزء الخاص

بزكاة الثروة الحيوانية لانك بتقسمها لثلاث انواع

الغنم ونصابه 40 غنمة والجاموس والبقر ونصابه 30 جاموسة اوبقرة

والابل ونصابها 5 من الابل وكان مطلوب مني ان احفظ كيفية اخراج الزكاه من هذه

المجموعات حسب الجدول الاتي

اولاً الاغنام

من 1 الى 39 لازكاة

من40 الى 120 شاه واحدة

من 121 الى 200 شاتان

من 201 الى 399 3شياه

ثم في كل مائه بعد ذلك شاه

ثانياً البقر والجاموس

من 1 الى 29 لا زكاه

من 30 الى 39 بقرة تبيع ((بقرة عمرها سنة ))0

من 40الى 59 بقرة مسنة ((بقرها عمرها سنتان))0

ثم في كل 30 تبيع وكل 40 مسنة

ثالثاً الابل

من 1الى 4 لا زكاه

من 5 الى 9 شاه من الغنم

من 10 الى 14 شاتان

من 15 الى 19 ثلاث شياه

من 20 الى 24 اربعة شياه

من 25 الى 35 بنت مخاض (انثي ابل عمرها سنة)0

من 36 الى 45 بنت لبون(انثي عمرها سنتين)0

من 46 الى 60 حقه ( انثى عمرها ثلاث سنوات)0

من 61 الى 75 جذعة (انثى عمرها اربعة سنوات)0

ثم في كل 40 بنت لبون وفي كل خمسين حقه

طبعاً وكان من الصعب جداً ان اتذكر كل هذه الاشياء في الامتحان وكنت خايف جداً ان الجزء ده يجي في الامتحان

طبعاً غير زكاه شركات الاموال وشركات الاشخاص والمنشأت الفردية وزكاة الثروة الزراعية والمستغلات

والمهن الحرة والثروة المعدنية والبحرية والثروة النقدية

المهم ركبت العربية ورايح الامتحان باطني مكركبة وحاسس باحاسيس غريبة

وكنت عاوز اقولكم اني مبعرفش اكل اي حاجة خالص قبل الامتحان حتي لا اشرب الماء فكنت مقلق جداً من الماده دي

دخلت اللجنة لقيت طلبة كتير قاعدين يكتبوا الجدول بتاع الثروة الحيوانية السابق عرضه على الديسكات

فقلت ده مش انا لوحدي اللي معرفتش احفظه

بس قلت لو جه انا مش عامله لاني فعلاً كنت نسيت الجدول تماماً

استلمت ورقة الاجابة وقعدت اسطر وجات بقى اللحظة اللي احنا مستنينها واستلمت ورقة الاسئلة

وهنا سألت المراقب قلتله هو ده الامتحان قالي اه قلتله غريبة والله قالي هو في حاجة قلت له مفهوش حاجة

وهو فعلاً الامتحان مفهوش حاجة خالص

مكتوب بخط الايد واللي كاتبه طالع يشرب ونازل يشرب

والامتحان من ثلاث اسئلة الثلاثة اتفه من بعض انا مستلم الورقة الساعة واحده مخلص الساعة اتنين الا ربع

ومش انا لوحدي الدفعة كلها تقريباً لاني طلعت الساعة اتنين لاقيت نصف الدفعة بره

وقعدين يضحكوا ضحك هيستيري من تفاهة الامتحان

حتى ان في واحد صحبي قال تعليق جميل قوي قال الدكتور ده جايب الامتحان للمعاقين فقط

واظن ان الدكتور كان ناسي ان احنا عندنا امتحان اصلاً وهما راحو له قبل الامتحان بخمس دقائق

فادلهم الثلاث اسئلة دول

بس والله اول مرة في حياتي اخرج من امتحان قبل انتهاء الوقت والحمد لله

كانت هذه قصتي مع محاسبة الزكاة

ولا تنسونا من دعائكم في باقي الامتحانات