بحبك ياريس "
قصائد الحب لمبارك أصبحت كثيرة جداً ربنا يكفينا شر هذا الحب
بحبك ياريس
بحبك يا ريس من ايام شبابك *** وبحلم بيوم أشوف فيه جنابك
تزورني في داري وتقضي نهاري *** وتاخد الماهية وتصرف بدالي
تكع الدروس وتدفع إيجاري *** ورسم النظافة ورسم المجاري
تخش في طابور لنص العصاري *** وتقسم معايا رغيف قمح روسي
مسرطن مدخن مكلكع حراري *** وتحلم بلحمة وفرخة وحباري
يجيلك فلافل ومش وبصاري *** وتاكل خضارنا بطعم المجاري
وتركب في "توك توك" يلف الحواري *** ويطلع مطب وينزل في حفرة وحلة مجاري
تقابل شباب في عمر الزهور *** على رصيف في شارع وتحت الكباري
محشش مبرشم معندوش مصاري *** ووشه مشلفط وله جسم عاري
هتعرف ساعتها تفرق مابين *** عيشة سعادتك وعيشة الجواري
بحبك ياريس
* * *
بحبك ياريس من ايام شبابك *** وبحلم بيوم أشوف فيه جنابك
تزور أهل غزة في ظل الحصار *** وتسمع دعاهم عليك ليل نهار
وأم بتصرخ في حالة انهيار ***تدور عيالها في وسط الدمار
وأطفال وجوههم عليها غبار *** ورافعين إيديهم برمز انتصار
وعايشين حياتهم في حالة احتضار *** ما بين هم فقر وبين ضرب نار
ومن كتر جوعك يجيلك دوار *** وتطلب علاج يقولك حصار
وتحتاج حديد عشان تبني دار *** وتحتاج حفايض وألبان صغار
وتحتاج تعالج جراحات كبار *** وتحتاج تسافر لخارج الديار
يسدوا المعابر عليك ليل نهار
وتصرخ تنادي ياعالم ياهوو هموت ارحموني وفكوا الحصار
يجيك رد بارد بطعم المرار
رئيس مصر مشغول بيبني الجدار
بحبك ياريس
2 comments:
أكيد أكيد كلنا بنحبه
جداااااااااااااااااا
هو احنا بنحب حد غيره فى الدنيا
هو بابا وهو ماما وهو انور وجدى كمان
:)
فى انتظارك اخى الفاضل لاستلام الواجب
تحياتى
ربنا يخده بقى
إحنا تعبنا
كده كفاااااااااااااااية
Post a Comment